Ég veit nú í raun ekki hvað ég er að fara að segja hér. Líklega er ég bara að láta þessa sjöllefu sem kíkja hér við reglulega vita að krepputal og ómagavæl hefur ekki knésett mig ennþá. Ég lifi og rúmlega það. Ég hef reyndar tapað bæði heyrn og minni síðan síðast. Hvort tveggja er ofmetið svo ég er rólegur.

Ég hef endurnýjað kynni við gamla vini og snillinga sem halda í mér tórunni. Fyrst ber að nefna fjölskylduvinina í Járnfrúnni og svo eru góðkunningjar í Fræbbblunum sem laga raskaða ró. Ég er á því að vikuskammtur af þessum tveimur höfðingjahópum ætti að vera inní verkahring manneldisráðs. Birta þetta bara á mjólkurfernunum. Mæla með svona rúmlega sautján mínútum á dag og væl og skæl landans myndi minnka um allavega þrjáfjórðu.

Núna er ég farinn að móast með báða meistaraflokka Völsungs. Það er gríðarlega gaman og gefandi. Það tekur dulítinn tíma reyndar en svona skipulagður maður eins og ég ætti ekki að vera í stórkostlegum vandræðum með þetta

Jæja Prowler hljómar núna svo undurblítt í eyrunum að ég er að hugsa um að hallast yndir flatt og leyfa Dickinson að svæfa mig hægt og hljótt.

Neih! Þar bloggaðann!

Tíminn tifar tafarlaust:

Nú hefur tíminn slegið met í hraðagangi. Líklega líður tíminn hraðar núna en einu sinni vegna gróðurhúsaáhrifa. Svo er ekki lokum fyrir það skotið að hann flýti sér líka vegna ástandsins í fjármálaheiminum.

Hávaxtakarfan:

Ég á ekkert efnislegt. Ég skulda eins og margir aðrir. Ég veit varla hvað hlutabréf er. Mér er eiginlega alveg sama þegar menn fara að tala um gengisvísitölu og gengi og vonir og væntingar í einverjum peningaheimi sem ég, greinilega, lifi ekkert í. Það pirrar mig bara þegar verðið í matvörubúðinni minni hækkar út af öllum þessum hamagangi.

Punglyndi:

Á maður eitthvað að leggjast í þunglyndi út af hlutabréfavæntingavonleysisvísitölu? Á maður að blóta ástandi markaðarins og hrapandi gengi krónunnar allan liðlangan daginn og setja upp öfuga skeifu í smettið og bera harm sinn utan á sér? Á maður virkilega að taka þátt í þessari  „göngum til blóðs“ helför sem skv. öllum fjölmiðlum liggur bara í eina átt; til sjálfrar mórauðrar móður andskotans í neðra. Ég nennessekki.

Sumarið var tíminn:

Sumarið þaut hjá og boltinn með. Stelpurnar stóðu sig með svoleiðis ágætum að ég hefði nú hreinlega ekki getað farið fram á meira. Töpuðum úrslitaleikjunum og fundum þar muninn á liðunum í okkar riðli og hinum. Væri alveg til í að halda áfram með stelpurnar þar sem maður sér náttúrulega hvað maður hefði viljað gera öðruvísi o.s.frv. en sjáum til. Það fer líka mikill tími í þetta og mikil orka. Ég hef lítið af hvoru tveggja.

Skólabjólfur:

Er á eftir. Ekkert meira um það að segja. Er að rembast (af veikum mætti) en finn mér svo snaggaralega eitthvað annað til dundurs en að sinna náminu. Lofa bót og betrun en loforð frá mér til mín hafa aldrei gengið eftir...aldrei.

Veiðivíma:

Ég er búinn að komast aðeins í veiði og slökkva mesta þorstann fram að rjúpu. Þetta gefur manni meira en glóandi, kristaltær kókaínköggull í nebbann og úti í náttúrunni er maður svo órafjarri dauðahryglunum í krónubjánanum og hrapandi og hoppandi vísitölugengiskhan að maður fær á tilfinninguna að maður sé maður. Svo er líka útlit fyrir að maður verði hreinlega að lifa á landsins gæðum því matarkarfan er farin að slaga uppí mánaðarlaunin mín (sem eru bæði ótrygg og óttalega smá) en gaman er frá því að segja að ég fer að verða sá eini á landinu sem fæ enn útborgaða fimm stafa upphæð. Verst að hafa ekki sett niður kartöflur.

Þeir sem engan veginn skilja um hvað ég er að tala í sambandi við útivist, veiði og tengsl við móður jörð þá ætti þetta myndband að veita nokkuð góða innsýn í þetta allt saman, plús félagskapinn. Sem er jú ómissandi í þessu brasi.

http://www.youtube.com/watch?v=94MZr1fMZx8

Erum byrjaðir í bolta í höllinni tvisvar í viku. Hatrammar orrustur eru háðar þar milli ungra og gamalla. Gamallir hafa unnið tvisvar en ungir aðeins einu sinni. Fyrir þá sem eru ekki nógu vel að sér í diffrun og þáttagreiningu fimmhliða kósínusjafna þá hallar tölfræðin aðeins á okkur í unga liðinu. En veturinn er bara rétt að byrja!

Enski er skemmtilegur. Það vita allir sem fylgjast með núna hvað ég er að tala um. Gaman að þessari byrjun. Jæja nú er verið að tala um eitthvað í einhverjum fyrirlestrinum í einhverju faginu sem ég á sennilega að kunna eitthvað í.

Lofa bót og betrun í bloggi...hef ekkert annað að gera þegar ég stunda þetta malarnám mitt.

Júnímánuður skaust framhjá mér á ógnarhraða. Ég náði ekki einu sinni að drepa niður ritlhönd. Margt hefur á gómana borið en ég hef hreinlega ekki liðamót í að skrifa það allt hér.

Boltinn gengur upp og ofan með, því betur, fleiri uppum. Veðrið í júní fer ekki í góðviðrisögubækur, nema kannski fyrir að vera heldur leiðinlegt - sem er reyndar leiðinda uppábrot í þeim bókum. Það er eins og að setja vonda uppskrift í uppskriftabækur. Reyndar eru margar uppskriftir vondar í uppskriftabókum en þið vitið (vonandi) hvað ég meina. Nú myndi ég hætta að tala ef ég væri að tala.

Það er búið að skjóta lifandis býsn af ísbjörnum frá því ég ritlaði síðast. Flestir hafa verið skotnir í Skagafirði. Verð hefur hækkað einhver býsn síðan síðast. Mest á bensínstöðvum. Ég hef gert býsn síðan síðast. Mest af mér.

Ég hef í raun ekki mikið um neitt að segja nema kannski að EM var skemmtilegt mót sem endaði vel. Bara ef öll mót enduðu svona vel. Feykiskemmtilegt sjónvarpsefni sem gladdi augað í flestöllum leikjum. Leiðinlegt í framhaldi af því að vera ekki með stöðtvösporteitthvað til að horfa á íslandsmótið því það er býsna skemmtilegt núna! Góðir leikir yfirleitt (sem ég hef séð) og ekki laust við að spenna verði í mótinu í sumar.

Það verður spenna í mótinu hjá okkur í kvennaboltanum í sumar sem er jákvætt fyrir alla. Ekki einhver tvö lið sem keppa um fyrsta og annað sæti. Þrjú lið virðast ætla að berjast um þessi tvö sæti sem bjóða uppá sæti í úrslitum. Meiðsli eru aðeins farin að sparka í hnéskeljarnar á okkur en maður í manns stað er auðvitað klisja sem seint verður gömul.

Ég komst aðeins í veiði og sé fram á aðeins meiri veiði. Það léttir geð og gleður sinnið mitt. Það líka seður svo ofboðslega vel þörfina fram að haustinu. Ofboðsleg þörf er þetta fyrir að drepa eitthvað.

Jæja, Lassie bíður og það veit sá sem allt veit að hundkvikindið, hvað þá börnin, bíður ekki endalaust.

Maðurinn var að sjálfsögðu Hilli litli vælukjói. Abbi fær að launum rennandi blautan ullarsokk sem hann fær að brúka á þann vælna að vild í viðurvist fjölmennis.

Vísbending 1

Maðurinn er ættaður frá Hömrum í Reykjadal

Það er svo hárfín lína milli sinnis og ósinnis sem aldrei er skýrari en á vorin. Þá á maður til að standa andaktugur yfir mófuglshreiðri og fella tár meðan hugurinn leitar í horfna tíma og bergmál horfinnar æsku ómar ógreinilega í fjarska áður en það fjarar út og hverfur í þreytandi umferðarnið nútímans. Andartaki síðar þerrar maður hvarmana, hleður á ný og dauðskýtur eitthvað með banvænu vopni sem framlengir á riddaralegan hátt smánarlega lítilsverðan manndóminn. Það er komið sumar.

Líklega er ég á topp 5 yfir lélegustu bloggara samtímans. En hvað um það. Ég hendi einhverju hér inn þegar andinn kemur yfir mann og tíminn leyfir. Nú get ég einmitt ekki beðið eftir því að skólinn verði búinn og maður getur að fullu einbeitt sér að sumrinu og boltanum.

Boltinn rúllaði af stað með „heimaleik“ í Boganum gegn Tindastól. Hann fór geypivel og liðið náði nýjum hæðum í leiknum. Frábær leikur í alla staði og svo til allt gekk upp. 4.flokkur drengja náði okkur niður á jörðina á sunnudaginn með því að rassskella okkur í Ýdölum. Óþolandi hugarfar í mínu liði þá og það sem lagt var upp með fór fyrir ofan garð og neðan. Þarna átti að undirbúa sig fyrir átökin í bikarnum á fimmtudaginn en allt kom fyrir ekki. Þær sem voru í líkamlegu lagi fyrir leikinn voru ekki í andlegu standi og öfugt. Kannski að 1-2 hafi komið þokkalega vel frá leiknum. Það er heldur lítið í 11 manna liði. Stórleikur á fimmtudaginn á Húsavíkurvelli. Allir þar.

Horfði á mína menn í mfl.karla tapa óþolandi fyrir Maggna í gær í bikarnum. Óþolandi og alveg hreint óviðunandi. Hef ekki trú á að jarlarnir  tapi fyrir þessu liði í mótinu í sumar. Reyndar voru maddnarnir þokkalegir það er ekki það. Þetta er samt Magni frá Grenivík!

Jæja ég veit s.s. ekkert hvað ég á að skrifa um hérna núna. Landsbankadeildin fer heldur betur hressilega af stað og fjöldinn allur af mörkum og látum líta dagsins ljós. Það er gaman fyrir okkur áhorfendur og vonandi spilarana líka. Verst að ég hef ekki kapital í að kaupa mér inní fjársvikaþvottavélina hjá Stöð 2 til að sjá leikina. Við hér fyrir norðan kíkjum nefnilega ekkert á völlinn í efstu deild. Það eru engin lið á landinu í efstu deild nema fyrir sunnan fjandinn hafi það. Jú nema Þór/KA hjá stelpunum.

Ég var að hugsa um að henda hér inn draumhamförum sem ég hafði fyrir nokkrum náttum en sökum ofboðslegs fjölda sem virðist kíkja hér inn daglega þá er ég hræddur um að ég opinberi hugsýki mína fyrir of breiðan hóp lesenda. Fyrir þá sem eru forvitnir þá fjallaði draumurinn um dónaskap, fyrrverandi íslenskukennara úr FSH, nekt og allskyns tímgunarferli.

Annar stórleikur á laugardaginn! Ljótu hálfvitarnir vs. Mfl.kvenna. Hver getur misst af þessu. Nánar auglýst síðar. Djöfull sem ég get ekki beðið eftir að sjá Ármann í framlínunni!

Sneiðin vann Hver er maðurinn. Sixarinn Illuga var maðurinn og hefur Sneiðin unnið sér inn bjarnarknús, kollu af betra ölinu og kvöldstund með mér berum að ofan.

Vísbending 1

Maðurinn er vælinn

Ég er nú engin skepna og ég lítilsvirði fólk yfirleitt ekki nema í algjörri neyð eða gríni.

Samt finnst mér eftirfarandi myndband of gott til að vera satt. Aumingjans manneskjan. Var virkilega ekkert hægt að gera? Var virkilega ekki möguleiki að komast þokkalega upprétt frá þessu? Þetta minnir mig hreinlega á sviðsmartraðirnar mínar. Allt stopp og allir að glápa í forundran yfir þrúgandi þögninni.

http://www.althingi.is/altext/hlusta.php?raeda=rad20080416T154338&horfa=1

Ég vil biðja hana Guðnýju afsökunar á því að hafa vakið enn frekari athygli á þessu. En Baggalútur og fleiri hafa nú þegar birt þetta á síðum sínum og tölvupóstar hafa flogið heimshorna milli með linknum í dag. Svona er þetta bara.

Annað er líklega verra. Margan á ég góðan Arsenal vininn. En ég bara stenst ekki mátið eftir að hafa séð svo stórbrotna mynd á síðunni hjá meistara Henry Birgi. Ég bara verð að fá að setja þessa mynd á síðuna mína líka. Ástæðan er einföld. Ég er búinn að sitja undir nógu miklum bolahægðum um fótbolta sem Liverpool maður til þess að sleppa því að skjóta á Arsenal menn ,sem enn eina ferðina misstu móðinn og glopruðu frá sér öllum dollum.

Þessi verður að fá að fljóta með í kjölfarið:

Annars er allt bærilegt að frétta af norðurvígstöðvunum. Við Ási fjármálaspekingur ætlum að veislustýrast í þrítugsafmæli Agga og bibba á laugardagskvöldið. Það verður örugglega fjör. Ég var að vona að Ási gripi í ódauðlegt hlutverk sitt sem Lárentsíus sýslumaður úr Skugga-Sveini og færi mikinn t.d. gæti hann tekið ógleymanlegt atriðið þegar Sveinki hafði rænt hann og hann barmar sér ógurlega yfir horfnum silfurskeiðum, hringum og peningunum, peningunum! Og heimtar svo auðvitað lakara ölið því ekki átti hann skilið betra ölið. Nú svo kemur blessunin hún Manga inn og veltir fyrir sér „hver ósköpin skyldu ganga á á Gili?“ Þvílík dæmalaus snilld hjá Matthíasi! Unaðslegt leikrit sem hefur allt Ég verð bara Sigurður í Dal áfram og við tölum um tíðindi í nokkra þætti áður en Geir og Grani koma inn með trúðasýninguna.

Þetta verður allavega gaman!

Ég kíkti í leikhúsið í gærkveldi þar sem LH var með kvöldvöku mikla undir yfirskriftinni Einu sinni var. Það var svona líka ljómandi gaman að sjá atriði tekin úr fjórum verkum sem sýnd hafa verið á fjölum gamla Samkomuhússins í gegnum tíðina. Síldin, Gúmmí-Tarzan, Salka Valka og já...Skugga-Sveinn. Skemmtileg, stutt kvöldskemmtun sem mætti alveg sjást oftar hjá LH.

Ég fór líka á skólasamkomu Borgarhólsskóla í gærmorgun. Þar var hnátan mín að syngja ásamt bekkjarfélögum sínum í 1.bekk. Það var nokkuð gaman. Skólakórinn söng, það var ágætt. Bróðir minn dansaði eins og berserkur við fjöruga afríska Djembe-tónlist, það var mjög gaman. Svo var þarna söngleikur sem 7.bekkur sýndi. Jósep heitir þetta mikla verk. Það var ekki gaman fannst mér. Ekki má misskilja mig núna því ég er alls ekki að segja að 7.bekkurinn hafi gert eitthvað illa. Ekki fannst mér heldur leikstjórinn (Gunna Stína) koma neitt sérstaklega illa frá þessu (fékk tæpar tvær vikur í þetta) og hvað Lisa tónlistarstjóri gerði er ég ekki dómbær á. Hinsvegar er staðan sú að ég veit ekkert um hvað þetta var. Já það má alveg skrifa það á vankunnáttu mína í biblíufræðunum en samt. Ég hef óljósan grun um að Jósep hafi átt slatta af bræðrum, lent uppá kant við ríkjandi yfirvald (og sofið hjá konu hans) og ráðið drauma. Þetta er nákvæmlega það sem ég náði! Ég er bara ekki stilltur inná þessa línu og því er ég kannski ekki nægilega móttækilegur. Sjálfsagt finnst öðrum þetta skemmtilegt en ég hlýt bara að vera svona mikill hrímþurs þegar kemur að svona söngleikjum.

Sólin skín og vorið er komið og grundirnar gróa og allt það. Liverpool ætla að fara að taka á því í CL og ég er orðinn stressaður. Jafnvel stressaðri en fyrir leikjum mfl. kvenna sem keppa nú á sunnudag gegn Hetti og laugardaginn eftir það gegn Tindastóli í Lengjubikarnum. Það er spennandi og gaman og hvet ég alla til að leggja leið sína á Egilsstaði og í Bogann viku seinna til að styðja dömurnar.

Vísbending 3

Maðurinn heldur með liði sem fær enga dollu þetta tímabilið.

Það líður svo langur tími á milli ritla hjá mér að mér er um megn að telja upp atburði og það sem hæst ber. Þetta þó helst:

Eyddi páskunum á Spáni. Það var ágætt. Mfl. kvenna var þar í æfingabúðum á Albir sem er einmitt steinsnar frá Benidorm. Þetta var áhugavert fyrir margra hluta sakir. Margt vannst í ferðinni með liðið og sennilega það besta við þetta allt saman hvað þær náðu að þjappa sér saman og kynnast betur.  Svo er líka ómetanlegt fyrir okkur að æfa svona mikið á stórum velli og það á grasi. Stór völlur er einmitt eitthvað sem við njótum einvörðungu í u.þ.b. 5 vikur á ári hér á Húsavík. Svo eru þessar stelpur náttúrulega meira og minna snillingar svo ekki gat maður annað en haft gaman þarna úti þrátt fyrir molluhitann. Stórgóð ferð á ferð.

Hugsa voða mikið um fótboltann þessa dagana svo hann verður líklega fyrirferðamikill hér sem annarsstaðar þar sem ég er.

Spiluðum fyrsta leikinn okkar í Lengjubikarnum í gær á Reyðarfirði. Já þar er fótboltahöll svo við fórum þangað bara til að sparka í bolta. Andstæðingarnir voru Fjarðabyggð/Leiknir. Fínasti leikur sem endaði 1-6 fyrir okkur. Góð byrjun á mótinu og magnað að spila svona skínandi leik en vitandi samt að nóg á liðið inni. Næsti leikur 20.apríl við Hött á Fellavelli.

Mótmæli á vörubílum! Það er athyglisvert og ekki algengt. Annars er maður orðinn svo skínandi fær í að láta dónaskap, eimyrju og óréttlæti yfir sig ganga að maður er orðinn dofinn og daufur gagnvart þessu öllu saman. Maður bregður ekki orðið svip yfir lágum launum, háu verði, mótmælum, lélegustu ársfjórðungum íslandssögunnar í peningum og offitufaraldri hvað þá annað. Mjólkurlítrinn fer að ná bensínlítranum og saman ná þeir bráðum brennivínslítranum. Ég á eftir að sakna stimpilgjaldanna. Enginn veit hvað átt hefur fyrr en misst hefur.

Nú hefur mig tvisvar (jafnvel oftar, er ekki viss) dreymt gulrætur. Já ósköpin öll af gulrótum! Hvað ætli þetta þýði? Ég reyndar át svo mikið af gulrótum og gulrótamauki þegar ég var lítill að ég varð appelsínugulur á litinn. Fólk hélt ég væri lasinn en þá var þetta bara gulrótaofát hjá kallinum. Hef aldrei getað borðað mjög mikið af þessum neðanjarðarmoldvöxtum eftir þetta órans-tímabil. Kannski táknar þetta mikil uppgrip í nýóstofnuðu fyrirtæki mínu; Klaufatölum ehf. Hilli. Ætlar þú að hjálpa mér af einhverri alvöru í þessum bransa eða hvað? Hvað gera félagsráðgjafar í tölu –og hnappaframleiðslufyrirtæki sem sérhæfir sig í hnöppum úr klaufum?

Djöfull sem ég skemmti mér ofboðslega vel og innilega í gærkveldi! Mér var boðið á frumsýningu leikdeildar Eflingar á Djöflaeyjunni í Breiðumýri. Alveg magnað hreint út sagt fannst mér. Höddi Ben er náttúrulega snillingur en hann er leikstjóri uppsetningarinnar. Ég var búinn að kíkja á rennsli (fyrir ljós og svona) og það var hreint með ólíkindum hvað þetta hafði smollið eftir það. Þarna eru náttúrulega óborganlegar persónur og eftirminnilegar en ég hef bæði lesið bókina tvisvar sem og séð myndina svo maður náði þessu öllu þrátt fyrir hraðsuðuhandritið sem er til fyrir þetta sem leikverk. Sýningin er s.s. mögnuð og gaman að sjá skyldmenni sín fara þarna hamförum en þær Hamrasystur og Hamraborgarmæðgur gætu lýst upp svartasta skammdegi með framkomu á sviði og heilluðu lýðinn í skemmtilegum lögum sem féllu fínt að sýningunni. Hjalti Bróa er náttúrulega fæddur sviðsdjöfull og er svona líka hrikalega flottur þarna. Ég fékk m.a.s. gæsahúð og allt! sem gerist nú ekki oft. Ég hvet alla til að leggja leið sína í dalinn og sjá þessa skemmtilegu sýningu hjá þeim Eflingarmönnum.

Vísbending 2

Maðurinn er úr sveit.

Helgrýtis mennirnir í útlöndum! Ráðast svona á blásaklaust Hannnesið! Hvað hef ég gert þeim? Ansvítans uppákoma. Klám-og kynlífstilboð og gyllinæðartilboð um limlengingar og herðingar.

Hannnes varð fyrir árás tölvuþrjóta í nótt að staðartíma. Ég ritlaði lítillega um FSH sýninguna sem ég fór á í gær og það fannst vírusþrjótunum greinilega alveg tilvalið til að sneisafylla kommentakerfið hjá mér af tenglum og krækjum inná sorasíður.

Ég er nú engin rauðsokka og berst líklega seint gegn klámi. En þetta er svona mátulega sniðugt á síðunni minni! Ég eyddi þessu öllu og endaði með því að finna eki færsluna mína aftur. Frábært.

Allavega. Ég fór með börnum og bróður á Kardemommubæinn í leikhúsinu í gær. P&Þ setti þetta upp og naut aðstoðar nokkurra jarla úr Borgarhólsskóla. Þetta var helvíta skemmtileg sýning. Leikararnir fínir og sviðsmyndin snilldarleg. Bara heilt yfir til fyrirmyndar. Einhverjir tæknilegir vankantar voru þarna (bilað ljósaborð) en krakkarnir leystu þetta eins og atvinnumenn og krakkarnir í salnum urðu ekki fyrir svo miklum truflunum vegna þessa.

Verst þótti mér um páfagaukabúrið mitt gamla. Já það var notað á ný í Kardemommubænum og þar á undan var það í herberginu mínu og hýsti skötuhjúin Gúnda og Lindu (ég átti Gúnda en Hilli bróðir skírði frekjubreðjuna sína Lindu, í höfuðið á Lindu Pjé!). Linda einmitt var ógeðslega mikil bredda og borðaði stundum næstum því Gúnda greyið. Hún beit af honum stélið minnir mig og hann flaug bara í hringi alveg gjörsamlega stjórnlaus eftir þessa fólskulegu árás! Linda hálfviti.

Sýningin var sumsé alveg skínandi skemmtileg og ljóst að margir þarna eiga eftir að gera það gott á sviðinu. Frábært hjá P&Þ og gaman að sjá gamla félagið sitt blómstr sem aldrei fyrr.

Jæja. Best að kíkja á Meistaradeild VÍS í hestaíþróttum.....RÚV! hvað er að??? Nei nú hringi ég í Jens.

Auðvitað var maðurinn Pálmi R. Pálmason. Geirfuglinn sjálfur, Ingvar Björn átti kollgátuna. Hann á inni gott grábjarnarknús frá mér við einn góðan veðurdag. Það er hinsvegar misskilningur að ég sé alltaf að gera grín að honum Pálma! Ég geri það yfirleitt ekki neitt! Einu sinni kannski þegar við vorum í rjúpum. En þá bauð hann algjörlega uppá það! Pálmi minn þú ert fínn.

Vísbending 1
Maðurinn er skemmtilegur

Það er svo margt sem veitir manni innri hugarlund. Nú er ágætis helgi að baki í boltanum. Mfl. spilaði við Tindastól og Þór og gekk bara þokkalega. Allavega er þetta alveg þokkalega statt núna fyrir sumarið. Það er alveg nauðsynlegt að fá þessa leiki svo menn muni hvernig íþróttin er á venjulegum velli. Leikurinn á móti stólunum var æði furðulegur og sennilega verstu fyrstu 10mín. í sögunni litu dagsins ljós. Leikurinn vannst nú nokkuð örugglega 8-2 en það segir s.s. ekki mikið þar sem þetta eru jú bara æfingaleikir. Margt fínt og sumt slæmt í þeim leik. Þórsleikurinn var bara þokkalegur líka miðað við að þær eru í úrvalsdeild og við lékum annan leik okkar á þrem dögum. Baráttan bara fín og héldum boltanum oft og tíðum bara mjög vel gegn sterku liði Þórs. Rakel Hönnudóttir var frammi hjá þeim og þvílíkt og slíkt. Manneskjan er bara vélmenni. Við fengum á okkur heldur mikið af ódýrum mörkum í þessum leik en skoruðum tvö glæsileg á móti (hefðu nú mátt vera fleiri miðað við semi-færi) sem var bara fínt. Lokatölur 7-2. Margt samt betra í þessum leik en í stólaleiknum.

 

Var líka með títlurnar í 5.fl. á Akureyri og þær spiluðu alveg glimrandi við Þór og KA . Fín upphitun þar fyrir Goðamót um helgina. Jájá það er auðvitað Goðamót á Ak. alla helgina. Maður er svo mikið heima hjá sér.

 

Græni hatturinn annað kvöld! Remba með Vönum mönnum á matseðlinum. Djöfull var gaman síðustu helgi. Það verður enn meira fjör núna, þú þar!

 

Þeir sem eru ekki búnir að fjárfesta í nýja Túpílakadisknum skulu hundskast í það hið snarasta. Frábær skemmtun fyrir alla fjölskylduna. Fyrirsögnin kemur fyrir í texta þar en með þessu textakorni hefur Hnodda-Bjarni hreinlega slegið öll met í fyndni í bundnu máli frá upphafi. Ég hlusta ,,alltaf á dag“ eins og Balli Qta

 

Vísbending 4

 

Maðurinn leikur knattspyrnu af miklum myndugleik. Hann leikur ekki með liði Selfoss, því miður. Ef hann gerði það hinsvegar þá kættumst menn (a.m.k. við Hilli) oft þegar hann segði sjálfur frá með hvaða liði hann léki).

Hvað er að gerast hér? Allt breytt? Breytti ég einhverju? Hver breytti mér? Ég vill ekkert breytast! Endalausar breytingar eru þetta!!!

Maður er rétt búinn að venjast Shell-mittisjakkanum með herðapúðunum þegar slíkur fatnaður dettur úr tísku. Maður er rétt farinn að finnast fiskur góður þegar hann er allt í einu orðinn dýrasti maturinn í kjötborðinu. Maður er rétt búinn að læra að láta leita að stöðinni sem vídjóið á að vera á þegar maður er búinn að leigja sér vídjó hjá Gæja á Torginu, þegar Torgið er rifið. Maður er rétt búinn að komast uppá lag með að láta Frímann í Búrfelli skrifa á mömmu þegar Búrfelli er lokað. Maður var rétt búinn að komast uppá lag með að selja útlendingum fiskinn úr sjúkrahúsræsinu við slippinn þegar trúðurinn kom á bryggjuna og spýtti öllum bæjarkúknum útí miðjan flóa. Maður er loksins kominn á bíl sem drífur upp sneiðinginn hjá Hlöðufelli þegar honum er lokað...og tippalykt af Hlöðufelli. Maður var loksins búinn að ná hraðanum við pökkunarvélina í mjólkurstöðinni þegar þeir færðu hana bara inná Akureyri. Maður var loksins búinn að taka Randver í sátt og farinn að hlægja að honum þegar hann lék konu í Spaugstofunni, þegar þeir létu hann hætta. Maður var loksins búinn að ná því að Rescue 911 var kl.21:00 á þriðjudögum þegar einhverjum datt í hug að William Shatner væri leikari og færðu hann yfir til Boston. Maður var loksins búinn að læra að skrifa Reinhard þegar þeir skiptu Bergi Elíasi inn. Maður var orðinn svo skínandi ánægður með borgarstjórann þegar...nei ég fer ekki útí það helvíti. Maður er nýbúinn að læra hvenær maður beygir inn til hægri þegar maður ætlar í salinn í Hvammi og kemur úr suðri (fljót að hugsa: Hvort er það við kirkjuna eða kaupfélagið? Tikk takk tikk takk tikk takk... þegar þeir...nei þeir reyndar breyttu því ekki.

En svona í framhjáhlaupi? Hver breytti síðunni minni svona? Herra bloggsentrall? Hvað gengur honum til? Á ég að gera eitthvað? Nei, nei...nei nú dámar mér og dreg mig í pung.

Vísbending 3
Maðurinn heitir sem betur fer þetta sem hann heitir, annars væri það oft fyndið þegar hann kynnti sig.

Kjallaradyrnar standa alltaf opnar. Það sem mig vantar kjallara og bílskúr og Stiga-sleða! Hver í andskotanum tók Stiga-sleðann okkar??? Hann hvarf bara einn tveir og bingó eina nóttina um þarsíðustu helgi. Skrambans óþokkaskapur að stela Stiga-sleða! Þetta er eign sem hver einstaklingur eignast aðeins einu sinni á ævinni! Ég t.d. eignaðist aldrei Stiga-sleða þegar ég var lítill. Ég fékk þoturass í jólagjöf þegar vinir mínir fengu Stiga-sleða. Ég fór svo með þeim (girtur rauða plastþoturassinum úr Hagkaup) uppá fjall í sleðaferð. Þeir öfunduðu mig á leiðinni upp. Ég hef öfundað þá síðan.

Ef þið sjáið svona rauðan og fallegan Stiga-sleða einhversstaðar á skrítnum stað þá látið mig vita. Það eru nokkur brostin hjörtu hér sem sakna sleðans óskaplega. Mitt þar á meðal!

Riðum þingmannaleið um þarsíðustu helgi. Hún tók okkur ekki nema 12 tíma, þ.e. stímið á miðin. Einir 4 tímar á Holtavörðuheiðinni í hvirfilbyl um miðja nótt. Það var óhemju rómantískt og skemmtilegt. Þar beygluðum við bíla og festumst í snjó og kólum og svona. Allt sem skemmtilegt og gott ferðalag þarf að hafa.

Broadway á föstudagskvöldinu. Magnað sjóv og fínasta stemmning. 150-200 manns á svæðinu og hefðu hæglega getað verið fleiri. Ég vil þakka Mara Geirs, Leibba og fleiri valmennum sem lögðu leið sína á Broadway til að berja þingeyskt tónlistarfólk augum þetta kvöld og samgleðjast. Ég verð nú eiginlega að segja að ég var alveg snarhissa á að sjá ekki fleira fólk sem ég þekkti þarna. Ekki trekkjum við mikið að greinilega! Þetta var frábær ferð, frábært sjóv og allt bara hið fínasta. En það er alveg ljóst að þetta brambolt borgar sig ekki ef fólk nennir ekki að mæta. Ég hugsa að meistari G.Bragason láti þetta gott heita af þessu brölti því fjármunir og tími hópsins er helvíti mikill fórnarkostnaður fyrir þetta marga. Búa ekki fleiri Þingeyingar (Húsvíkingar)fyrir sunnan? Það eru fleiri hundruð manns á Vest-og Austfirðingasjóvum þarna! Jæja nóg væl um það.

Hér hefur verið standandi vitlaust veður í einn og hálfan mánuð núna. Ég hef þurft að hætta tvisvar við að fara með stelpurnar austur í æfingaferð og er það að verða býsna þreytandi. Tveir æfingaleikir framundan sem gætu kætt geðið eitthvað. Tindastóll á laugardaginn og Þór á mánudagskvöld. Svo held ég að ég sé að fara að leika á brókinni í leikriti (Remba) á laugardagskvöldið. Man þetta nú ekki alveg en það hlýtur að rifjast upp þegar ég fer úr fötunum.

Aggi fær náttúrulega einhver verðlaun fyrir giskið sitt við fyrstu vísbendingu. Þá hann skrifaði athugasemd á alnetið þá var hún ekki af verri endanum. Ég tók strax þá framsóknarlegu ákvörðun að hann væri að grínast og er enn á því að þetta sé hrikalega fyndið gisk hjá honum. Alveg er ég viss um að Böbba hefur líka þótt þetta hundleiðinlegt.

Vísbending 2

Maðurinn á nafna (fornafn) sem einnig heitir tveim nöfnum (eftirnafn ekki það sama) og það sama gildir um hann; sami stafurinn kemur ekki fyrir tvisvar. Báðir eru þeir frá Húsavík.

Allir reiðir við Spaugstofuna. Eru þeir málsvari fólksins í landinu? Endurspegla þeir skoðanir og húmor almennings? Nei alls ekki góurinn. Reykjavík er orðin svo óaðlaðandi og slepjuleg í augum mínum eftir þetta fíaskó undanfarið að ég á líklega eftir að ganga í síðbuxum þegar ég kem þangað næst. Ég og Mark erum ekki mikið í síðbuxum alla jafna.

Þetta smokrast áfram hér norðan heiða við sinn vanagang; æfingar, leiðbeinsla og æfingar, skóli á haka og fjölskylda í veikindum. Nú er allt að fara á fullt í boltanum hjá mfl. og allt gott um það að segja. Þrír æfingaleikir framundan í febrúar og ferð til Spánar um páskana, deildarbikar þar á eftir og svo bara sumarið. Þetta verður fljótt að líða held ég. Það er ótrúlegur munur að þjálfa stráka og stelpur, ótrúlegur. Það sem maður sér þetta í nýju ljósi hjá stelpunum. Ætli þetta sé sama íþróttin? Annars er þessi hópur frekar magnaður og æfir heilt yfir vel. Þetta verður bara mjög fínt með þessu áframhaldi. Þær hlupu einmitt uppí Mývó um helgina til að safna aur. Ekki amalamlegt það.

Hef tekið þá gerræðislegu ákvörðun að leggja leiðbeinandaprikið á hilluna eftir þennan vetur. Maður getur ekki verið í sjálfboðaliðastarfi alla ævi. Hér er manni otað í átt að því að taka kennsluréttindin en það veit sá sem allt veit að ég hef svo sannarlega læknast af þeirri dellu. Grunnskólakennarar á Íslandi eru líklega allir sem einn kolruglaðir. Að þiggja öll þessi laun fyrir þessa léttavinnu er náttúrulega bara rannsóknarefni. Kennararnir ykkar! Hættið þessu! Þið fáið hærra kaup fyrir að tína krækiber og selja á götuhorni en að eiga við misuppgíruð, lyfjaþrútin ofvirknistilfelli með athyglisbresti og önnur léttvæg vandamál! Sveiattann!

Handboltamótið var örugglega mjög skemmtilegt. Íslendingum gekk svona lala á mótinu en við vitum ekki mikið um restina. Jú mikið rétt, við vitum hvernig úrslitaleikirnir fóru því þeir voru sýndir (en ekki endurteknir, nema úrslitaleikurinn sjálfur). Helvítis glæpafyrirtækið RÚV var með sjónvarpsréttinn á EM þetta árið og nýttu hann svona líka fínt. Þeir sýndu okkur leikina með Íslendingum (eðlilega) en ekkert utan við það! Af hverju að eiga réttinn og sýna ekkert? Mér finnst þetta bara aumingjaháttur. Ættum við kannski bara að sýna úrslitaleikina í HM og EM í fótbolta (ég veit alveg að tölur og staðreyndir varðandi fjölda áhorfenda í þessum tveim íþróttagreinum halla á handboltann) þegar þær keppnir standa yfir, vegna þess að Íslendingar eru aldrei með? Það horfa næstum því 90% á íslenska liðið á þessum mótum. Fer þetta niður í 10% þegar önnur lið keppa t.d. Danmörk, Frakkland eða Króatía? Hvað með pólska liðið? Hér búa nú sérdeilis margir Pólverjar. Svei þessu alla tíð.

Ég ríð þingmannaleið um helgina með G.Bragasyni og er stefnan tekin á Broadway. Þar ætlum við að syngja okkur inní hug og hjörtu þjóðarinnar á föstudagskvöldið ásamt rjóma tónlistarmanna úr héraði. Það verður gaman. Þið þar!

Hvíslaði því svo að mér neflangur fugl að Rósa frænka stefndi saman bláblóðsættlegnum úr Rangá að heimili sínu á laugardag til að gína yfir trogum og sýrukútum. Hugnast mér það vel og hefi ég gripið til þess ráðs að hafa með mér Gjallarhornið og Heiðrúnu yndir sitthvorum handleggnum og spenna á mig megingjarðir.

Bibbi mæ frend! Auðvitað var þetta hann Mölli okkar! Alnafni pabba hans (Magnús Þorvaldsson) hélt aldeilis sölunni í FSH sjoppunni á floti á sínum tíma með reglulegum og mjög ákveðnum innkaupum. Mölli er búinn að vera sleitulaust í skóla síðan haustið 1985 og sér hvergi fyrir endann á því. Hann á engin börn ennþá en hefur jú skotið a.m.k. einu slíku í heitmey sína nú þegar. Nú sjá allir einfaldleika vísbendinganna í sjálfu sér og kíma við! Bibbi hefur unnið sér inn bjarnarknús og jafnvel söng frá mér í góðu tómi. Hann er að kveðja kjöt í Rio de Janeiro í augnablikinu svo hann innheimtir bara seinna.

Ást og virðing til allra dyggra lesenda sem enn leggja leið sína hingað inn þrátt fyrir stopular uppfærslur. Nú skal ég gerast duglegri og skrifa meira og oftar einhverja sýrubiðu þegar kaffibollar dagsins ná tveggja stafa tölunni.

Vísbending 1

Maðurinn heitir tveimur nöfnum en þó kemur hver stafur aðeins fyrir einu sinni

Gleðilegt ár og takk fyrir það gamla. Megi gæfa og gjörvuleiki ekki vera sitthvað á árinu fyrir ykkur og þar fram eftir götunum.

Jólin liðu í svimamóki með reyktu og bleiktu og laufabrauði með MaltVallashblöndu í legg. Skyr í matinn fram að páskum. Hversdagsrútínan að silast af stað á þessu herrans ári 2008 og er það vel. Það er fínt bara. Spáin slæm og aldrei að vita nema við hreppum eins og eitt rafmagnsleysi á næstu dögum. Kalt, dimmt, frosið, vindur og snjór, er hægt að hafa þetta betra?

Boltinn rúllar í rólegheitum og stelpurnar í mfl. bara nokkuð sprækar. Kíktum í Bogann fyrir jólin og spiluðum við Þór með harla fínum árangri. Vorum óheppin að gera ekki jafntefli en í lokin skipaðist skjótt veður í lofti Bogans og í restina settu þær fjórða markið sitt eftir að okkur mistókst að setja okkar þriðja úr víti. Heldur óvæntur leikur fyrir bæði mig og liðið er ég nokkuð viss um. Nú er stefnan tekin á Spán í æfingaferð um páska svo þetta er bara meget spændende í það heila.

Ég fékk Stiklur á DVD í jólagjöf og sennilega er diskurinn, umslagið, pappírinn og merkimiðinn þyngdar sinnar virði í gulli. Heimsókn Ómars frá 1975 að Guðmundarstöðum í Vopnafirði er svo stórbrotin að hún gæti komið hvaða líkþorni sem er til að hlæja. Nú er ég búinn að sýna öllum sem koma í heimsókn, jah... sem hreinlega eiga leið um landareignina, þennan frábæra þátt og hafa menn skemmt sér vel. Ef það er ekki nóg þegar annar bróðirinn hefur upp raust sína við gamla orgelið, svo stássstofan hreinlega riðar öll til og frá, þá hreinlega sprengir það háræðar er þeir bræður klyfja 25 ára gamlan hest sinn svo ógurlega að allt loft grey skepnunnar þrýstist út með ægilegum látum á þónokkuð löngum tíma undir hljómfögru hummi og blístri annars eiganda síns. Ómar Ragnarsson ásamt hljóðmanni og klippara þáttarins sáu ekki hina minnstu ástæðu til að dempa hljóðið agnarögn eða neitt því þarna er allt hækkað í botn  og drunurnar fylla vel útí heimabíókerfið! Dásamlegt, alveg hreint dásamlegt. Öllum er boðið í kaffi og Guðmundarstaðaheimsókn að Stórhóli!

Nú er þetta orðinn lengsta umferð í Hver-er-maðurinn-leiknum en þegar ég loks ætlaði að segja ,,gefstupp“ við ykkur gott fólk kemur ekki Dóri Daða með innlegg á síðustu stundu (við síðustu færslu) og glóðvelgir þetta dæmi allt saman. Hann hittir þarna ákveðinn nagla lóðbeint á höfuðið enda man hann vel hver hélt uppi sjoppunni í FSH á vorum menntaárum þar. Dóri fær í rauninni pínu rétt fyrir að hafa áttað sig á þessum erfiðu vísbendingum en hárrétta svarið er handan við hornið. Þangað til, farið ekki langt.

Ps. Ef þið eruð að tippa á ensku leikina þá setjið þið X við leiki Liverpool...yfirgnæfandi líkur!

Pps. Bók vikunnar: Rokkað í Vittula. Mynd vikunnar: Kopps (sænskt þema í gangi)

Vísbending 4

Maðurinn er kallaður M...i

Ég þakka góðar kveðjur og þessumlíkt sem fylgdu í kjölfar síðustu færslu og get vart skorast undan smekklegri og hugheilli áskorun nafna míns um dálítið ritl nú yndir lok jólaföstu.

Nafna mínum til fróðleiks hef ég verið heldur óduglegur við að fasta þessa aðventuna og er því í ágætis formi fyrir reykt og bleikt þessi jólin. Ætli maður verði ekki bara að taka á því eftir jólin. Fara í fjallgöngur, heyra í Sollu á dræmum kosti, leggjast í rafmagnsbað og borða nýrnasteinasúpur. Eru kjúklingabaunir úr kjúklingum? Nýrnabaunir??? Eru kannski til brisbaunir?

Ég er akkúrat núna að sjóða saman yndisleg próf fyrir blessaðan unglingaskrílinn hér í Borgarhólsskóla. Ætla að hafa þau aðeins þyngri núna svo mér líði enn betur með að vera ekki í prófum sjálfur. Angist annarra veitir manni furðulega fró á köflum (de Sade?).

Ég er líka að þjálfa eins og hafur þessa dagana en það minnkar aðeins um áramótin þegar ég læt þriðja flokkinn í traustar hendur Danna löggu. Furðulegt samt þar sem eftir verða þá tveir flokkar í mínum lúkum, mfl. kvenna og 5.fl. Ætli það hafi ekki verið síðast í sumar þegar ég stóð eins og haninn á hólnum og lýsti því yfir digurbarkalega að ég myndi aldrei þjálfa stelpur aftur (prófuðum það kallarnir, ég og Unnar M. í ein tvö sumur) eftir síðustu reynslu. Skjótt skipast veður í lofti og líklega má segja að ég sé eins digur vindhani sem lýsir yfir hinu og þessu og gerir svo eitthvað allt annað í næstu vindátt. Vindhanar gera reyndar ekkert voðalega mikið og lýsa yfirleitt ekki neitt. Það passar fínt við mig.

Það er bara svo furðulegt að sjaldan hefur maður verið jafn áhugasamur um þjálfunina og með þessa tvo flokka, skil þetta bara ekki, þetta bara gerðist, það er eitthvað við þetta. Ég myndi alveg skilja af hverju Hilli bróðir væri áhugasamur um svona þjálfun en ég næ ekki uppí þetta með sjálfan mig. Þetta er bara gaman. Jæja nóg um það. Hilli minn; ég veit þú ert vælandi heima núna með smá kvef og þú heldur að þú sért að skilja við o.s.frv. en ég bara kaupi þetta ekki. Þú sérð bara jólafríið í hillingum og vilt komast í jólafrí og ætlar helst að setja flest þín verkefni yfir á mig. Rístu nú á fætur, réttu úr þér og skottastu á hlöðuna með bindi og bók, eldmóð í augum, mat í malnum, böll í brók og kláraðu þetta hrafnahrafl sem eftir er!

Nú er ellin handan við hornið og ég finn af henni fnykinn. Ég er að fara á laugardaginn með dóttur mína á fótboltamót. Hún er að fara að taka þátt! Ég er svona níræður að verða og óska mér góðra ævisagna, göngustafs og heyrnartækja í jólagjöf.

Enn er leikurinn langdregni í gangi og hér kemur enn ein vísbendingin. Athugið þó að engir sleikar eru í boði frá mér í verðlaun (Pálmar er þó undantekning því hann er svo sleikinn) en ég skoða þó að veita verðlaun í formi veraldlegra gæða fyrir rétt svar í þessari getraun því hún er, að því er virðist, strembin að þessu sinni. Já! Segi það hérmeð og skrifa. Sigurvegarinn fær innpakkaða jólagjöf frá mér í verðlaun, með merkimiða og alles!

Vísbending 3

Maðurinn er skólakær

Það gengur svo. Ég fæ örugglega engin bloggverðlaun þetta árið. En best að setja niður nokkra þankaganga mér og öðrum til mikils ama.

Það er frumsýning á laugardaginn. Íslandsklukkan eftir Halldór Kiljan Laxness er á fjölunum þessa dagana og leik ég þar dómkirkjuprest í kjól með skalla. Það er ágætt. Þetta verður ákaflega flott sýning er ég viss um því Nóri frændi klikkar ekki í leikstjórastólnum. Svo er sviðið líka þétt setið af hæfileikafólki svo þetta verður skemmtun sem enginn verður svikinn af.

Ég tók líka að mér þjálfun Mfl. kvenna. Það er spennandi verkefni sem ég reyndar hugsaði mikið og lengi um áður en ég játti. Ég byrja 1.des. og ég held að það verði bara gaman. Góður hópur og hungraður eftir að hafa fundið nasaþefinn af því að komast upp um deild í sumar. Áhugavert og ég er bara nokkuð spenntur.

Hilli litli skrifaði um ótrúlega lífsreynslu okkar bræðra allra um daginn af viðskiptunum við Sölku. Óffi (ellemenn jennsenn) pantaði sér flatböku einvörðungu með skinku og lítinn skammt af brauðstöngum. Þetta kostaði litlar 1900 kr. og tók 1 og hálfa klst. að koma í hús! Ekki tók nú betra við þegar sendillinn var veskislaus og hirti bara allan 2000 kallinn af litla greyinu skiptimyntslaus!!! Þetta er svo ótrúlegt að það er engu lagi líkt. Við vorum rétt að jafna okkur á hláturskastinu eftir að hafa komist að því hvað þetta kostaði þegar sendillinn reið á brott með enn meira í veskislausum vasanum!!!! Ekki tók betra við þegar við opnuðum pizzukassann og skoðuðum „ matinn“. Ég tók mynd af „pizzunni“ sem ég ætla að eiga um aldur og ævi. Þetta er eitt það fyndnasta sem við höfum lent í og séð á okkar aumu ævi.

Ég er klipptur eins og ég veit ekki hvað. Jú reyndar veit ég það þar sem ég er klipptur eiginlega alveg eins og Nonni frændi Hólabiskup. Nema hvað hann lét líklega ekki klippa á sig skalla. Ég ætla að biðja Hilla um að taka mynd af þessu og setja á síðuna sína þegar hann kemur um helgina. Þetta er eitthvað sem enginn aðdáandi hálfvitalegra aðgerða má láta framhjá sér fara.

Vísbendingin 1 er kannski svolítið torskilin en verður það ekki þegar upp rennur ljós fyrir mönnum!

Vísbending 2

Maðurinn á engin börn ennþá

Ég ól manninn í borg óttans um helgina. Sat þar prestanámskeið allan liðlangan daginn og er alveg dauðuppgefinn eftir það. Erfiðir þessir prestar, svo eru þeir svo misjafnlega pirraðir útí nýju þýðinguna!

Ég fékk inni hjá Hilla litla, Baldri litla og Sneiðinni og gisti í Arnars holu þar sem hann er ekki á landinu. Þetta er prýðilegt heimilishald hjá köllunum. Allt voða afslappað og samhugur, samkennd og væntumþykja allsráðandi. Ég sá þvottahús í miklum blóma með ofboði af óhreinataui. Baldri brá fyrir allsberum að snæðingi. Fleira var þarna allsbert sem tekur ekki að nefna. Sneiðin eldaði  á ævintýralegan hátt eins og vindurinn og klykkti út með Eldfærunum en sterkari gúllasrétt hefur enginn maður smakkað! Góður samt, takk fyrir mig enn og aftur Addi minn.

HnoddaBjarni renndi yfir nýóútkominn disk þeirra Túpílaka fyrir okkur bræður á föstudagskvöldinu. Ég hvet alla til að kaupa sér eintak. Þetta er stórbrotinn gripur og enginn svikinn af þesslags kaupum. Hlógum dátt og hefðum hlegið dáttar ef ég hefði ekki verið með þindarbólgu úr þreytu.

Aji verð að fara að gera eitthvað. Hitti fleira fólk og segi líklega betur frá þessari ferð bara seinna, eða ekki. Líklega ekki. Sá mína menn tapa fyrir Arsenal á sunnudaginn. Það var spennandi. Góð lið bæði tvö og góður leikur maður minn.

Stebbi Friðrik æsku-og uppeldisfélagi minn úr Gólan er auðvitað maðurinn! Snillingurinn atarna er svo örvhentur að leitun er að öðru eins og hann á afmæli heilum tveim dögum á undan mér. Hann var s.s. enn rakur þegar ég fæddist. Við höfum oft verið rakir saman í seinni tíð svo þetta er allt í lagi. Havartinn átti kollgátuna og vinnur sér inn plötuna með Rangárbræðrum, 10 tíma ljósakort hjá Rós í Sólbrekkunni og 4 bls. ritgerð um Napóleon Bonaparte sem unnin var á aðventu 1994.

Lifið heil.

Vísbending 1

Nafni pabba mannsins tók oft að miklu leyti þátt í ferðakostnaði útskriftarnema FSH á ofanverðri 20.öldinni.